Украинанын Куралдуу күчтөрүнүн Башкы штабы Бахмуттун жанындагы Андреевка кыштагы орус күчтөрүнөн бошотулганын жума күнү эртең менен ырастады. Ошондой эле Клещеевка кыштагында жарым-жартылай ийгиликке жеткенин маалымдады.
14-сентябрда коргоо министринин орун басары Анна Маляр Андреевка бошотулганын жарыялаган. Анын артынан эле ал жакта салгылашып жаткан бригада "бошотулду" деп айтууга эрте экени билдирген.
Андреевка - Бахмуттун жанындагы украин аскерлери орус күчтөрүнөн кайтарып алган биринчи кыштак.
Бахмут - Украинадагы уруштун кандуу чордонуна айланган. Ал аймакты Орусиянын жалданмалары - "вагнерчилер" ээлеп алгандан бери украин армиясы каармандык менен кармашып жатты.
Орус аскерлери Андреевкадан жана коңшулаш Клещеевкадан чыгып кете баштаганын орусиялык бир катар Телеграм каналдар шаршембиде кабарлашкан.
