Украинанын президенти Владимир Зеленский Сумы облусунун аскердик администрациясынын башчысы Владимир Артюхту кызматынан бошотту. Бул тууралуу Украинанын маалымат каражаттары жазды.
Маалыматка караганда, украин президентинин мындай чечимине Сумы облусунун Конотоп шаарынын мэри Артем Семенихиндин билдирүүсү себеп болду. Семенихин облус жетекчилиги шаарда аскерлердин иш-чарасын өткөрүү менен жай тургундардын коопсуздугуна коркунуч келтиргенин айткан.
"Ал (Артюх) бүгүн бул жерде 117-бригададагы баатыр жигиттерибизге грамоталарды, медалдарды тапшырууну уюштурду. Бул баарына маалым. Бул жакта эч нерсе болгон эмес деп айтканыбыз туура эмес. Аскерлердин эч кимиси жабыркаган жок. Алар баары баш калкалоочу жайда болушту. Орусия эми өз агрессиясын акташ үчүн ал жерде аскерлер болгон деп айтып жатат", - деди ал видео кайрылуусунда.
Владимир Артюх аталган иш-чара шаарда өткөрүлгөнүн, бирок аны өзү уюштурбаганын билдирген. Анын ордуна Сумы облусунун аскердик администрациясынын башчысы болуп Олег Григоров дайындалды.
15-апрелге караган түнү Орусиянын Курск аймагы жапырт дрон чабуулуна кабылды. Маалыматка караганда, бир адам каза болуп, кеминде тогуз адам жабыркады. Жергиликтүү Телеграм-каналдар чабуулга турак үйлөр туш болгонун жазышты.
Каза болгон адам 85 жаштагы байбиче экени кабарланды. Тогуз адам дрон сыныктарынан алган жараатынан улам ооруканага жеткирилди. Облустун губернатору Александр Хинштейн дрон чабуулуна үч кабаттуу үй туш болгонун, натыйжада өрт тутанганын билдирди. Анын тургундары убактылуу коопсуз жайга көчүрүлдү.
Орусиянын Коргоо министрлиги шаршембиге караган түнү Курск облусунда Украинанын 109 дрон атып түшүрүлгөнүн жарыялады. Украина бул тууралуу комментарий бере элек.
14-апрелде түштө Орусиянын чабуулунан төрт адам набыт болгонун Харьков облусунун башчысы Олег Синегубов билдирди.
"Купянскидеги аткылоодон 68 жаштагы эркек киши жана 61 жаштагы аял набыт болду. Шевченко айылына болгон чабуулдан 77 жаштагы аял жана 52 жаштагы эркек киши каза болду", - деди Синегубов.
14-апрелге караган түнү Харьковдун Салтов району бутага алынганы кабарланды. Бул тууралуу шаардык администрациянын башчысы Игорь Терехов билдирди. Анын айтымында, өндүрүш кампаларында өрт тутанды. Жабыркагандар тууралуу кабарланган жок.
Запорожье облусунун Новояковлевка айылында дрон чабуулунан 63 жаштагы жергиликтүү тургун каза болду.
Сумыда дүйшөмбү күндүз болгон чабуулда бир адам жабыркады.
14-апрелге караган түнү Орусиянын армиясы Украинага “Шахед” жанкечти дрондору менен чабуул койду. Дрон чабуулуна Одесса, Донецк жана Днепропетров облустары туш болду.
Одессада кеминде сегиз адам жабыркады. Өзгөчө кырдаалдар мамлекеттик агенттигинин маалыматына караганда, облуска жекшемби күнү кечинде чабуул болду. Шаардык оорукана, бир нече кампа жана инфратүзүм жабыркаганы маалымдалды.
Орусиянын Коргоо министрлиги 13-апрелде Сумы шаарына эки “Искандер-М” ракетасы менен чабуул жасалганын ырастады. Министрлик "Украинанын Куралдуу күчтөрүнүн командалык штабынын жыйыны" өтүп жаткан жерди бутага алууну көздөгөнүн билдирди.
"Жекшемби күнү орусиялык аскерлер Сумы шаарында Украинанын Северск оперативдүү-тактикалык тобунун командалык штабынын жыйыны өтүп жаткан жерге "Искандер" ракетасы менен чабуул койду. Анда 60тан ашуун украин аскери набыт болду", - деп жазылган маалыматта.
"Киев режими украин калкын тирүү калкан катары колдонуп, калк жыш жайгашкан шаардын борборунда аскер кызматкерлеринин катышуусунда иш-чараларды өткөрүүдө", - деп айтылат орус армиясынын билдирүүсүндө.
Согуш маалында эки тараптын тең маалыматын көз карандысыз булактардан текшерүү мүмкүн эмес.
Орусиянын армиясы жекшембиде Украинанын Сумы шаарынын борборун баллистикалык ракета менен аткылаган. Би-Би-Си радиосу аткылоодо Сумы университетинин балдар билим алган Конгресс борбору зыян тартканын жазды.
Украин тарап соккудан 35 киши каза тапканын тактады, 100дөн ашууну ар кандай жараат алды. Каза тапкандардын экөө, жараат алгандардын 15и балдар.
Далилдерге карабастан расмий Москва жарандык жайларды аткылаганын четке кагып, бир гана аскердик жайларды бутага алганын билдирип жүрөт.