Украинанын Одесса облусунда 32 миңдей абонент электр жарыгысыз калды. Бул тууралуу энергетика министринин милдетин аткаруучу Артем Некрасов шаршемби күнкү маалымат жыйынында билдирди. Анын айтымында, 13-14-декабрда болгон жапырт чабуулдан аймактагы энергетикалык объектилердин бир нечеси зыян тартты. Күн сайын орто эсеп менен алганда негизинен майданга жакын жерлерде 400 миңдей кардар жарыксыз калып жатат.
Одесса облусунун аскердик администрациясынын башчысы Олег Кипер 16-декабрда подстанциялар жабыркаган Одесса шаарында өзгөчө татаал абал түзүлгөнүн, түйүндү пайдубалынан баштап калыбына келтирүүгө туура келгенин айткан.
The Washington Post гезити булактарына шилтеме менен соккулар Украинанын батыш аймагынан чыгышка энергия жеткирген системаны керектен чыгарышы ыктымал деп жазган. Дал ушул батыштагы облустарда энергиянын көбү өндүрүлөт.
Басылма менен маектешкен адамдын айтымында, Кремл «энергетикалык аралдарды» түзүү стратегиясын ишке ашырууда.
Расмий Киев жана эл аралык уюмдар жарандык инфраструктурага жана жайкын тургундарга сокку урууну согуш кылмышы катары сыпаттайт. Ал эми орус бийлиги далилдерге карабай, аскердик жайларды гана бутага алганын айтып келет.
Краснодар крайындагы Славянск-на-Кубани шаарына жасалган учкучсуз учактардын чабуулунан улам мунай иштетүүчү заводдо өрт чыкты.
Аймактын оперативдүү штабынан билдиришкендей, заводдун ичине дрондун сыныктары түшүп, "технологиялык жабдуулар жана 100 чарчы метр аймактагы өткөрүүчү түтүк күйгөн". Өрт өчүрүлгөн.
Украиналык Exilenova+ жана Supernova+ Телеграм каналдары мунай заводдогу өрт делген сүрөт жана видеолорду жарыялашты.
Орусиянын Коргоо министрлиги 17-декабрга караган түнү Украина тараптан учурулган 94 дрон алты аймактын жана Азов, Кара деңиздин үстүнөн атып түшүрүлгөнүн кабарлады. Анын ичинде 31 дрон Краснодар крайынын үстүнөн жок кылынган.
Штабдын маалыматына ылайык, чабуулдан эки адам жабыркады. 13 миңге чукул адам жашаган Славянскиде электр энергиясын берүү үзгүлтүккө учурады.
Аймак губернаторунун орун басары Александр Руденко суу, электр энергиясы жана жылуулук өчкөнүнө байланыштуу 21 бала бакча жана үч мектеп убактылуу жабылганын маалымдады.
Украинанын Куралдуу күчтөрүнүн Башкы штабы Славянскидеги мунай заводуна сокку урулганын ырастады. Бутага алынган аймакта жарылуу жана өрт чыкканын билдирди.
Согуш шартында тараптардын маалыматтарын көз карандысыз булактардан тактоо мүмкүн эмес.
Орусиянын агрессиясына жооп иретинде Украина орус армиясын камсыздаган ишканаларды бутага алып келет.
Өзбекстандын соту Кашкадарыя облусунун 40 жаштагы тургунун жалданмачылык беренеси менен төрт жылга эркинен ажыратты. Бул тууралуу UzNews кабарлады.
Камаши райондук сотунун өкүмүнө шилтеме менен таратылган маалыматта ал адамдын толук аты-жөнү көрсөтүлбөстөн 2015-жылы Орусиянын жараны менен никеге турганы, орус паспортун алганы айтылат. Быйыл мартта өлкөнүн сыртына чыгуу үчүн документ алам дегенде, ага аскердик каттоого туруу керектиги айтылган. Ал өзү айтып бергендей, Приморье крайындагы аскердик бөлүккө күчтөп жөнөтүлгөн. Майданга жиберишерин билип калганда эски оорусун айтып, операция жасаткан. Ооруканадан чыккандан кийин Өзбекстанга жол тартып, ал жакта Мамлекеттик коопсуздук кызматынын башкармалыгына кайрылган. UzNews ал Орусиянын Коргоо министрлиги менен келишимге кол койгонун жазат.
Gazeta.uz басылмасы Өзбекстандын Мамлекеттик коопсуздук кызматына шилтеме менен 2022-жылдан бери өлкөдө чет жактардагы куралдуу жаңжалдарга жалдануу беренеси менен 338 кылмыш иши козголгонун маалымдаган. Мекеме ал адамдардын диний-экстремисттик жана эл аралык террордук уюмдарга кошулганын же чет өлкөлүк аскердик түзүмдөргө жалданганын аныктаган. Кайсы жаңжалдар тууралуу кеп болгону белгисиз.
Орус армиясынын катарында канча өзбекстандык согушуп жүргөнү белгисиз. Расмий Ташкент андай маалыматтарды расмий жарыялаган эмес. Украинанын мамлекеттик "Хочу жить" долбоору быйыл октябрда Өзбекстандын кеминде 2 715 жараны Украинага каршы согушканын же согушуп жүргөнүн аныктаган.
Долбоордун эсебинде, 2023-жылы Орусия тарапта 498 өзбекстандык, ал эми быйыл алгачкы алты айда дээрлик 1300 адам согушкан.
Кыргызстанда дагы Украинада орус армиясынын катарында согушкан бир нече адам кылмыш жоопкерчилигине тартылган.
Орусиянын Ростов облусу дрондордун жапырт чабуулуна кабылды. Бир катар электр зымдары үзүлүп, турак жайлар жабыркаганы кабарланды. Орусиянын Коргоо министрлиги билдиргендей, 15-декабрга караган түнү украин армиясынын 146 учкучсуз аппараты атып түшүрүлдү. Ростов облусунун губернатору Юрий Слюсарь Ростов-на-Дону шаары, Каменск, Новошахтинск, Каменский, Константиновский жана башка райондор жапырт чабуулга туш болгонун айтты. Анын сөзүнө караганда, жабыркагандар жок, бирок автоунаалар, жеке үйлөр жана айрым имараттардын терезелери сынган. Astra Телеграм-каналы жазгандай, украин армиясы Новошахтинск мунай азыктарынын заводунун филиалына сокку урууну көздөгөн болушу мүмкүн. 14-декабрдын кечинде Белгород шаарындагы “Луч” жылуулук электр борборуна (ТЭЦ) сокку урулган. Бул тууралуу “Пепел” жана Astra каналдары жазды. Белгород облусунун башчысы Вячеслав Гладков чабуулдун кесепетинен инфраструктура олуттуу зыян тартканын билдирди. Ал эми Астрахань облусунда 38 дрондун мизи кайтарылганын маалымдады. Расмий Киев Орусиянын аймагындагы соңку чабуулдар боюнча эч кандай комментарий берген жок. Адатта украин күчтөрү орус армиясына колдоо көрсөткөн мунай ишканаларын бутага алып келет. Ал арада Орусия армиясы 15-декабрга караган түнү Украинаны абадан жапырт чабуул койду. Украин Аба күчтөрүнүн маалыматына ылайык, орус күчтөрү жалпысынан 153 дрон менен кол салган. Алардын 133ү жок кылынган. Днепропетровск облусунда орус чабуулунун кесепетинен эки адам жабыркады, инфраструктура жана транспорт ишканасы зыян тартты. Бул тууралуу облустун башчысы Владислав Гайваненко билдирди. Кийинчерээк куткаруучулар Синельников районунда чыккан өрттү өчүрүп жатышканда орус армиясы кайрадан сокку урганын маалымдашты. Анын натыйжасында куткаруучу жана ишкананын бир кызматкери жабыркап, экөө тең ооруканага жаткырылган. Расмий Москва көптөгөн далилдерге карабастан Украинадагы жарандык жайларга сокку урганын четке кагып, бир гана аскердик объектилерди бутага аларын айтып келет.